मन्त्रीको पहलमा जिल्ला अस्पताल अर्घाखाँचीका लागि जनस्वास्थय सामाग्री

अर्घाखाँची । लुम्बिनी प्रदेश सरकारले पठाएको स्वास्थ्य सामग्री जिल्ला अस्पताल अर्घाखाँचीलाई हस्तान्तरण गरिएको छ । फ्रन्टलाईनमा काम गर्नेहरुका लागि अत्यावश्यक ११ किसिमका जनस्वास्थयका सामाग्री एक कार्यक्रमकाबीच शनिवार हस्तान्तरण गरिएको हो ।

कार्यक्रममा बोल्दै पूर्वसंसद चन्द्रबहादुर खड्काले कोरोना भाईरस संक्रमणका बिरुद्ध एकजुट भई लड्नु पर्ने आवश्यकतामा जोड दिए । उनले संक्रमणका सिपाई फ्रन्टलाईनर भएको समेत बताए । यो महामारीको समयमा सचेततापूर्वक खटिनुको विकल्प नरहेको बताए । नेकपा एमालेका केन्द्रीय सदस्य समेत रहेका नेता खड्काले विषम परिस्थितिमा स्वास्थ्यकर्मी, सुरक्षाकर्मी ,जनप्रतिनिधी , नागरिक समाजलगाएतको भूमिका महत्वपूर्ण हुने बताए । उनले जिल्ला अस्पतालमा कुनै पनि उपकरण र स्वास्थ्य सामग्रीको कमि हुन नदिने प्रतिवद्धता समेत जनाए ।

समाग्री व्यवस्थापनमा खटिएका अभियान्ता बाबुराम बन्जाडेले जनस्वास्थ सामाग्रीको अभावले हुन सक्ने जोखिम न्यूनीकरण गर्न मद्दत पुगोस भन्ने उद्देश्यले काम गरिएको बताए । उनले अर्घाखाँचीबाट निर्वाचित लुम्बिनी प्रदेशका आन्तरिक मामिला तथा कानुन मन्त्री चेतनारायण आचार्यको पहलमा जिल्लाका लागि आवश्यक सामाग्री प्रदान गरिएको बताए । ‘मन्त्रीज्यू सधै समस्याहरुका बारेमा संवेदनशील हुनुहुन्छ । हामी उहाँ कै संयोजनमा कार्य गरेका हौँ ।’, उनले भने ।

जिल्लामा देखिएको समस्यामा केही सहयोग होस भन्ने गरी  कानून मन्त्री आचार्यको पहलमा काम गरिएको मन्त्रीका स्वकीय सचिव प्रदिप नेपालीले बताए ।

पछिल्लो समय अर्घाखाँची जिल्लामा कोरोना संक्रमणको दर समेत बृद्धि हुँदै गएको छ ।

प्रमुख जिल्ला अधिकारी विष्णु पौडेलले जिल्लाका बासिन्दाको स्वास्थ्य प्रति आफुहरु सचेत रहेको बताउँदै जनतालाई आबस्यक पर्ने सबै खालको सहयोग गर्ने धारणा राखे ।

कार्यक्रममा बोल्दै जिल्ला अस्पताल बिकास समितिका अध्यक्ष कृष्ण भुसालले अस्पतालको क्षमता बृद्धि गरी अस्पताललाई सुबिधा सम्पन्न बनाउने गरि काम भैरहेको बताए । अर्घाखाँची जिल्ला अस्पतालका मेडिकल सुपरिटेन्डेन्ट डा. कपिल गौतमले अक्सिजन प्लान्ट निर्माणको काम सुरु भएको बताए ।

फ्रन्टलाइनमा काम गर्ने जिल्ला अस्पतालका स्वास्थयकर्मी, जिल्ला दैवीप्रकोप उद्दार समिति, नेपाली सेना, नेपाल प्रहरी ,सशस्त्र प्रहरी, राष्ट्रिय अनुसन्धान कार्यालयका कर्मचारीहरुले प्रयोगमा ल्याउनेछन् ।