एजेन्सी – युवा सनसनी एर्लिङ ब्राउट हालान्ड चम्कदा युईएफए नेसन्स लिगमा नर्वेले नर्दन आयरल्यान्डमाथि सानदार जित हात पारेको छ । नर्वेले नर्दन आयरल्यान्डमासथ उसकै मैदानमा ५–१ को सानदार जित हात पारेको हो ।

वाइन्डसर पार्क बेलफास्टमा सोमबार राति भएको खेलमा नर्वेको फराकिलो जितमा हालान्ड र एलेसान्दार सोरलोथले समान दुई तथा मोहमेद इलयुनोउसीले एक गोल थपे । नर्दन आयरल्यान्डका प्याट्रिक म्याक्नेयरले गरेको गोल सान्त्वना बन्यो ।

एकपक्षीय खेलमा नर्वेले खेलको तेस्रो मिनेटमा नै मोहमेदको गोलबाट अग्रता बनाएको थियो । उनले कप्तान स्टेफन जोहानसेनले दिएको क्रसलाई पेनाल्टी बक्समा चेस्टले नियन्त्रणमा लिदै गोल गर्न सफल भएका थिए ।

छैटौ मिनेटमा घरेलु टोलीका प्याट्रिकले खेललाई १–१ गोलको बराबरीमा ल्याए । ड्यानियल बलार्डको क्रसमा फरवार्ड कोनोर वासिङ्टनले एक डिफेन्डरलाई बिट गर्दै गरेको प्रहारलाई नर्वेका गोलरक्षक रुनी जार्सटेइनले पञ्न गरेर बचाएपनि अनमार्क रहेका प्याट्रिकले बललाई जाली चुमाएका थिए ।

त्यसको एक मिनेट नबित्दै एर्लिङ ब्राउट हालान्डले गोल गर्दै ननर्वेलाई पुनः खेलमा २–१ को अग्रता दिलाए । डिफेन्स लाइबाट आएको लामो पासलाई सोरलोथले हेडरमार्फत मिलाइदिएको पासमा आलान्डले पेनाल्टी बक्सबाहिरबाट गरेको सशक्त प्रहार सिधै गोलमा परिणत हुदा नर्दन आयरल्यान्डका गोलरक्षक बेइलेले रोक्ने कुनै अवसर नै पाएन ।

१९औं मिनेटमा आइताम एलिसामीको क्रसमा सोरलोथले गोल गर्दै नर्वेलाई पहिलो हाफमा ३–१ को अग्रता दिलाए । ४७औं मिनेटमा हालान्डको पासमा सोरलोथले व्यक्तिगत दोस्रो गोल गर्दै नर्वेलाई ४–१ को आरामदायी स्थितिमा ल्याए ।

कप्तान जोहानसेनको लामो पासलाई नियन्त्रणमा लिदै पेनाल्टी बक्ससम्म पु¥याएर आफैले अवसर पाएपनि हालान्डले सोरलोथलाई पास दिएका थिए । ५८औ मिनेटमा हालान्डले व्यक्तिगत दोस्रो गोल गर्दै नर्वेलाई ५–१ को फराकिलो जिततर्फ अग्रसर गराए ।

कप्तान जोहानसेनबाट सोरलोथ हुदै डिफेन्डर ओमारले हेडमार्फत मिलाइदिएको पासमा हालान्डले गोल गर्न सफल भएका थिए । त्यसपछि पनि दुवै टोलीले गोल गर्ने अवसर पाएपनि चुकाउदा नर्वे ५–१ को फराकिलो जित निकाल्न सफल भयो ।

जितसँगै लिग ‘बी’ १ मा रहेको नर्वेले दुई खेलबाट ३ अंक जोड्दै तेस्रो स्थानमा रहेको छ । रोमानिया ४ अंक जोडेर शीर्षस्थानमा रहँदा ३ अंक नै जोडेको अष्ट्रिया नर्वेभन्दा हेड टु हेडमा अघि छ । नर्दन आयरल्यान्ड १ अंक जोडेर पुछारमा छ ।

यही समूहको अर्काे खेलमा रोमानियाले अष्ट्रियामाथि ३–२ को जित निकालेको छ । रोमानियाको जितमा डेनिस एलिबेक, ड्रागोस ग्रिगोरे र एलेसान्द्रु म्याक्सिमले गोल गरे । अष्ट्रियाका क्रिस्टोफ बाउमगार्टनर र करिम ओनिसिवोले गोल गरे ।

अन्य नतिजा
लिग ‘ए’ १ – बोस्निया एन्ड हर्जगोभिनाविरुद्ध पोल्यान्ड (१–२), नेदरल्यान्ड्सविरुद्ध इटाली (०–१)

लिग ‘सी’ ४ – काजकस्तानविरुद्ध बेलारुस (१–२), अल्वानियाविरुद्ध लिथुआनिया (०–१)

लिग ‘बी’ १ – नर्दन आयरल्यान्डविरुद्ध नर्वे (१–५), अष्ट्रियाविरुद्ध रोमानिया (२–३)

लिग ‘बी’ २ – इजरायलविरुद्ध स्लोभाकिया (१–१), चेक रिपब्लिकविरुद्ध स्कटल्यान्ड (१–२)