बुटवल,चैत्र४गते।रंगहरूको पर्व फागु पूर्णिमा तथा होली तराई र पहाडी जिल्लादेखि सबै ठाउंमा मनाईएको छ।पहाडी जिल्लाहरुमा ३ गते बिहीबार र तराईका जिल्लाहरुमा ४ गते शुक्रबार आज हर्षोउल्लासका साथ मनाइयो। भौगोलिक संरचना र मान्यता अनुरूप फागु पूर्णिमा मनाउने परम्परादेखिको चलन चल्ती छ ।होलीका अवसरमा केन्द्र सरकारले २ दिन सार्वजनिक बिदा दिएको छ। पहाडी जिल्लामा विहिबार सार्वजनिक बिदा दिइएको थियो भने, तराईका जिल्लामा आज शुक्रबार सरकारले सार्वजनिक बिदा दिएको थियो। हिमाली र पहाडी भेकमा फागु र मधेशमा होली भनिन्छ।

            मैथिली भाषामा भने होलीलाइ फगुआ र होरी भनिन्छ।तराई–मधेशका अधिकांश क्षेत्रमा पूर्णिमाको       भोलिपल्ट होली पर्व मनाइने चलन भएपनि प्राचिन मिथिलाको राजधानी जनकपुधाममा अन्तरगृह परिक्रमा सकेको भोलिपल्ट होली पर्व मनाइने गरिएको छ। सबै प्रकारका भेदभावलाई भष्म गरी परस्परमा रङ हाल्दै सबैलाई रशरंगले तरंगीत तुल्याउने होली उल्लास र रंगिचंगीको पर्व पनि हो। सबैलाई एउटै रंगमा रंगाउने होली पर्व समानता र सद्भावको प्रेरणा स्रोत रहिआएको मानिन्छ। हिन्दू, मुस्लिम,सिख, इसाई, मंगल, किरांत, राई आदिमा एकताको सन्देश दिंदै यस पर्वले सबैको मनमा उमंग एवं उत्साहको सञ्चार गर्दै आएको छ। असत्यमाथि सत्यको, छलमाथि निष्छलताको र अधर्ममाथि धर्मको विजयको प्रतिक होलीले अनेकतामा एकता कायम गर्ने विश्वास गर्ने गरिएको छ। वैदिक यज्ञसंग जोडिएको होरीमा आगोमा चीर डढाउने यो पर्वमा मिथिलाञ्चलमा नयां अन्नलाई आगोमा पोलेर प्रसादका रूपमा खाने चलन पनि छ। यसै क्रममा होली पर्वको परम्परा ऋतुराज वसन्तका मित्र मदन अर्थात कामदेवको पूजाबाट शुरू भएकाले यस उत्सवलाई मदनोत्सव या वसन्तोत्सवका रूपमा पनि मनाइन्छ। पत्रकार महासंघ रुपन्देहीले पनि होली पर्व मनाएको छ। महासंघले आयोजना गरेको होली मिलन कार्यक्रममा पत्रकार महासंघमा आवद्व पत्रकारहरु, राजनीतिक दलका नेता तथा कार्यकर्ता, स्थानीय जनप्रतिनिधि र उद्योगी व्यवसायीहरुको सहभागितामा होली पर्व मनाइएको हो। होली पर्वले अनेकतामा एकता जोड्ने र आपसी सद्भाव कायम राख्ने भएकाले होली पर्वलाई मर्यादित रुपले मनाउनु पर्ने पत्रकार महासंघ रुपन्देहीका अध्यक्ष रामराज पोखरेलले बताए। त्यस्तै भैरहवामा पनि पे्रस क्लवको आयोजनामा होली मिलन कार्यक्रमको आयोजना गरी होली पर्व मनाइएको छ। एक आपसमा भाइचाराको सम्बन्ध जोड्ने उद्वेश्यले होली मिलन कार्यक्रमको आयोजना गरी होली पर्व मनाइएको लुम्बिनी पे्रस क्लवका अध्यक्ष नरेश केसीले बताए ।