बुटवलमा शंकास्पद मृत्यू गुल्मीका रामबहादुरको, हत्या भएको परिवारको दावी

बुटवल, कार्तिक १४ गते । गुल्मी मुसीकोटका ४५ वर्षिय रामबहादुर राना गत फागुन २४ गते बुटवलमा मृत अवस्थामा भेटिएका थिए । होटेल तथा रेष्टुरेन्ट ब्यबसायी राना
आठ महिनाअघि शंकास्पद रुपले मृत अवस्थामा फेला परेपछि घरपरिवार मृत्यु नभइ हत्या भएको दावी गरेका थिए । आठ महिना अघि मृत भेटिएका रामबहादुर रानाको मृत्यु भएको होकी कसैले हत्या गरेको हो भन्ने  प्रहरीले पत्ता लगाउन सकेको छैन ।

प्रहरीले अझैसम्म पनि हत्यारा पत्ता लगाउन नसकेको परिवारको गुनासो छ । गत फागुन २४ गते राती बुटवल ६ चाँदबारीस्थित खोलामा रामबहादुरको शंकास्पद रुपमा हत्या भएको र घटनाको अनुसन्धानमा प्रहरीले चासो नदेखाएको पिडित परिवारले गुनासो गरेका हुन् ।
होटेल तथा रेष्टुरेन्ट ब्यबसायी रामबहादुरको बुटवल ६ पुरानो बुटवल चलचित्र हलको पछाडीतिरबाट दिपनगर डेरातर्फ जानेक्रममा हत्या भएको र आफ्नो श्रीमानको शंकास्पद रुपमा मृत फेला परेको भएपनि प्रहरीले घटनालाई गम्भीर रुपमा नलिएको भन्दै श्रीमती अम्बी रानाले चिन्ता ब्यक्त गरेकी छन् । मृतक रामबहादुरकी श्रीमती रानाले पत्रकारहरुसँग कुरा गर्दै घटना घटेको आठ महिना बितिसक्दा पनि प्रहरीले घटनाको अनुसन्धानमा चासो नदिएको बताएकी छन्

रातको पौने १० बजेसम्म परिवारको सम्पर्कमा रहेका राना राती घर नगएपछि अर्को दिन बिहानै खोजतलास गर्दा परिवारले मृत अवस्थामा फेला पारेका थिए । मृतकको टाउकाको पछाडीको भागमा गम्भीर चोट लागेको र सिसी टिभि फुटेजमा एक ब्यक्तिले कठालोमा समातेर लगेको देखिएकाले दुर्घटना नभएर हत्या भएको परिवारको दाबी छ ।

मृतक रानाकी श्रीमतीले आफ्नो श्रीमानको हत्या भएको र प्रहरीमा पटक पटक किटानी जाहेरी दिएपनि प्रहरीले जाहेरी दर्तासमेत नगरेको गुनासो गरेकी छन् । घटनास्थल नजिकै करिब १ सय मिटरको दुरीमा प्रहरी विट छ ।

ईलाका प्रहरी कार्यालय बुटवलका प्रमुख एवं डिएसपी दानबहादुर थापाले घटनाको अनुसन्धान भैरहेको र निष्कर्षमा नपुगेसम्म सबै कुरा थाहा नहुने बताए । शंकाश्पद मान्छेहरुलाई सोधपुछ भएको डिएसपी थापाले जानकारी गराए ।