काठमाडौँ। मौसम पूर्वानुमान महाशाखाका अनुसार, मनसुनको न्यून चापीय रेखा सरदर स्थानको आसपास रहेकाले आज देशभर वर्षाको सम्भावना छ।

आज दिउँसो देशभर साधारणतया बदली रहनेछ। कोशी, वाग्मती, गण्डकी र लुम्बिनी प्रदेशका केही पहाडी तथा तराईका भागमा मध्यम वर्षाको सम्भावना छ। यसैगरी, कोशी, वाग्मती र गण्डकी प्रदेशका पहाडी भेग तथा लुम्बिनी प्रदेशको तराई र पहाडी क्षेत्रका एकदुई स्थानमा भारी वर्षा हुने सम्भावना छ।

आज राति पहाडी भागमा साधारणतया बदली रही बाँकी भागमा आंशिक बदली रहनेछ। पहाडी भागका केही स्थानमा मध्यम वर्षाको सम्भावना छ भने गण्डकी र सुदूरपश्चिम प्रदेशका पहाडी भेगका एकदुई स्थानमा भारी वर्षा हुन सक्नेछ।

महाशाखाले वर्षाका कारण पहाडी भागमा पहिरो, गेग्रान बहाव (डेब्रिज फ्लो), नदीनालामा पानीको सतह बढ्ने र यातायात क्षेत्र प्रभावित हुन सक्ने भन्दै सबैलाई सतर्क रहन र पूर्वतयारी गर्न अनुरोध गरेको छ।