काठमाडौँ । पूर्व उपप्रधानमन्त्री एवं एमालेका पूर्व उपाध्यक्ष डा. भीमबहादुर रावलले पार्टीबाट निष्काशनपछि गरेका प्रतिक्रियाले नेकपा एमालेको आन्तरिक विवादलाई पुनः सतहमा ल्याएको छ ।

प्रधानमन्त्री तथा पार्टी अध्यक्ष केपी शर्मा ओलीलाई ७४ बुँदामा प्रश्न सोध्दै रावलले आफूलाई सोधिएको स्पष्टीकरणलाई पूर्वाग्रहपूर्ण र प्रतिशोधमुखी भएको बताएका छन् ।

रावलले पार्टीको आन्तरिक प्रक्रियाबारे प्रश्न उठाउँदै, कुनै पनि सदस्यलाई कारबाही अघि संवाद र छलफल गर्नुपर्ने राजनीतिक परिपाटीको उल्लंघन भएको बताएका छन् । साथै उनले विगतका घटनालाई आधार बनाएर सोधिएको स्पष्टीकरणलाई हाँस्यास्पद रहेको बताएका छन् ।

पाँच दशक पार्टीको सेवा र जिम्मेवारी सम्हालेको व्यक्तिसँग छलफल नगरी गरिएको स्पष्टीकरण पूर्वको कारबाही प्रतिशोध र पूर्वाग्रहको उपज भएको उनले बताए । तीन वर्षअघिका कुरा निकालेर गरिएको स्पष्टीकरण हाँस्यास्पद मात्र होइन, नियत खराब रहेको स्पष्ट हुन्छ, रावलले भनेका छन् ।

उनले पार्टी महासचिवका वक्तव्यलाईसमेत कटाक्ष गर्दै, एआई प्रयोग गरी पार्टी अनुशासन सिकाएको आरोप लगाएका छन् ।महासचिवको भ्रमित र विरोधाभासी अभिव्यक्तिले पार्टी नेतृत्वको चरित्रमाथि गम्भीर प्रश्न खडा भएको भन्दै रावलले ओलीलाई नै जवाफ दिन आग्रह गरेका छन्।

यो विवादले एमालेभित्र गहिरो आन्तरिक समस्या रहेको संकेत गरेको छ। यस्तो परिस्थिति पार्टीको आगामी रणनीतिमा कसरी प्रभाव पार्छ भन्ने चासो सबैको लागि रहन्छ। रावलले बुधबार पत्रकार सम्मेलन गर्दै अब देशभक्तहरु समेटेर नयाँ पार्टी गठन गर्ने बताए । उनले उक्त पार्टी कम्युनिष्ट चरित्रको नहुने समेत स्पष्ट पारे ।