प्रदेशसभा सञ्चालन गर्न लुम्बिनीमा एमाले सहमत
![](https://nayadishaonline.com/wp-content/uploads/2023/07/lumbi-ni-pardesh.jpg)
![](https://nayadishaonline.com/wp-content/uploads/2023/07/357622966_794524715535073_6037331566326578600_n.jpg)
बुटवल, असार २० गते । लुम्बिनी प्रदेश सभाको बैठक सञ्चालनका लागि प्रमुख प्रतिपक्षी दल एमालेले सत्ता पक्षलाई सघाउने भएको छ । बजेटप्रति असन्तुष्टि जनाउंदै एमालेले बैठकमा अवरोध गर्दै आएको थियो । एमालेले असार १३ गतेदेखि बजेटमाथिको छलफलमा अवरोध गर्दै आएको थियो ।
![](https://nayadishaonline.com/wp-content/uploads/2023/07/308463823_1115005542726158_1075373799681304027_n.jpg)
मुख्यमन्त्री डिल्लीबहादुर चौधरीसहितको छलफलपछि एमालेले बैठकमा अवरोध नगरी सहयोग गर्न तयार भएको हो । मंगलबारको बैठक एमालेले बहिष्कार गरेको थियो ।
एमालेको बहिस्कारका बीच आर्थिक वर्ष २०८०÷८१ को बजेट प्रदेश सभाले पारित गरेको थियो । बैठकको पूर्वसन्ध्यामा सभामुख तुलाराम घर्तीमगरले मुख्यमन्त्री चौधरी, नेकपा एमालेका संसदीय दलका नेता लिला गिरी, उपनेता चेतनारायण आचार्य, प्रमुख सचेतक तुलसी चौधरीसहितको बैठक बोलाएका थिए ।
उक्त बैठकमा एमालेले उठाउंदैै आएका मागका सम्बन्धमा मुख्यमन्त्री चौधरीले आजको बैठकमा सम्बोधन गर्ने र एमालेले सदन संचालनमा अवरोध नगर्ने सहमति भएको एमालेका प्रमुख सचेतक चौधरीले बताए ।
![](https://nayadishaonline.com/wp-content/uploads/2023/07/357989126_242148201936365_5896978333846174401_n.jpg)
लुम्बिनी प्रदेश सभाका सचिव दुर्लभकुमार पुनले सदन सन्चालनबारे सहमति जुटेको बताए । प्रदेश सभाका सचिव दुर्लभकुमार पुनका अनुसार आजको बैठकमा सबैभन्दा पहिले मुख्यमन्त्री चौधरीले सम्बोधन गर्ने कार्यसूची रहेको छ ।
हिजो मंगलबारको बैठकमा एमालेले बजेट किताब च्यातेर बहिस्कार गरेको थियो । त्यसपछि सभामुख घर्तीमगरले बैठक अनिश्चितकालका लागि स्थगित भएको घोषणा गर्नुभएको थियो ।