बुटवल, असोज २८ गते । रुपन्देही क्षेत्र नम्बर २ बाट उम्मेदवारी खारेजीमा परेका राजु गुरुङको रिटमाथिको सुनुवाइ स्थगीत भएको छ । शुक्रवार न्यायाधीश हरि फुँयालको इजलासमा परेको रिटमाथिको सुनुवाइ निवेदकका कानून व्यवसायीका तर्फबाट स्थगीत गरिएको हो । बैंकिङ कसूरमा कालोसूचीमा रहेको भन्दै निर्वाचन आयोगले गुरुङको उम्मेदवारी खारेज गरेको थियो । गुरुङले पांच दलीय गठबन्धनको तर्फबाट उम्मेदवारका रूपमा एकीकृत समाजवादीबाट उम्मेदवारी दिएका थिए ।
आफ्नो उम्मेदवारी खारेज भएपछि गुरुङले सर्वोच्च अदालतमा रिट दायर गरेका थिए । गुरूङलाई अदालतले बैंकिङ कसुरमा दुई हजार रूपैयां जरिवाना गरेको र उक्त जरिवाना सहितको भुक्तानी दिनुपर्ने रकम नदिएको प्रमाण फेला परेको भन्दै निर्वाचन अधिकृतको कार्यालयले उनकोे उम्मेदवारी खारेज गरेको हो ।
गुरूङसहित नेकपा एकीकृत समाजवादीका वरिष्ठ नेता झलनाथ खनालका छोरा निर्भिक खनाल सहितका नाममा रहेको कम्पनीले वेस्ट प्रोजेक्ट कन्स्ट्रक्सन्स एन्ड सप्लार्यस प्रालिका अध्यक्ष अन्जित विष्टलाई दिएको चेक बाउन्स भएपछि उनीहरूविरूद्ध २०७६ साउन ६ गते मुद्दा दर्दा भएको थियो ।
काठमाडौं जिल्ला अदालतले नर्थ वेस्ट नेपाल इन्फ्रा प्रा.लि.का अध्यक्ष राजु गुरुङ र सञ्चालक निर्भीक चित्रकार खनाल, फुर्वा छिरिङ शेर्पा, सन्जिव राई र शक्तिमान डंगोल समेतले दिएको चेक अनादरसम्बन्धी मुद्दामा २०७८ मंसिर १२ गते उनीहरूमाथि जरिवाना गर्ने फैसला गरेको थियो ।

गुरूङ लगायतलाई जनही दुई हजार जरिवाना र २ करोड २५ लाख रूपैयांको चेक काटिएको मितिदेखि २०७६ साउन ६ गते सम्मको सयकडा १० प्रतिशतका दरले कानुन बमोजिमको ब्याजसहित भुक्तानी दिनुपर्ने फैसला गरेको थियो । गुरूङहरूको उक्त कम्पनीले २०७३ साल फागुन २० गते २५ लाख, फागुन ३० गते २५ लाख, चैत १५ गते २४ लाख, चैत ३० गते ५४ लाख, २०७४ वैशाख १५ गते २५ लाख, वैशाख ३० गते ३० लाख, जेठ १५ गते ३५ लाख रूपैयाँ गरी ७ वटा चेक दिएकामा बैंकमा पर्याप्त रकम नभएको भन्दै फिर्ता भएपछि उनीहरूविरूद्ध उजुरी परेको थियो ।
निकोलसका समर्थहरु धर्नामा

यस्तै रुपन्देही क्षेत्र नम्बर २ बाटै उम्मेदवारी दिएका नेपाली जनता पार्टीका डां कमल भुसाल (निकोलस)को पनि निर्वाचन उम्मेदवारी खारेज गर्दिको थियो ।
निर्वाचन कार्यालयले उक्त पार्टीका उम्मेदवार डा. कमल भुसाल (निकोलस)को उम्मेदवारीमा उजुरी परेपछि छानविन गरी बदर गरेको हो । कार्यालयले कार्यातालिका अनुसार नै असोज २५ गते बदर भएका उम्मेदवार बाहेकको अन्तिम नामावली प्रकाशन गरिसकेको छ ।
विर्नाचन कार्यालयले गलत निर्णय गरेको भन्दै हाम्रो नेपाली पार्टीका उम्मेदवार निकोलसका समर्थकहरुले निर्वाचन अधिकृतकोे कार्यालय रहेकोे बुटवल उपमहानगरपालिकाकोे पुरानो भवनकोे गेटमा शुक्रबार धर्नामा बसेका छन् ।
धर्नामा निकोलसका बुबा तुलसीकुमार भुसाल, उनका दाजु सागर भुसाल लगायत (निकोलस) का समर्थक बिभिन्न प्ले कार्ड प्रदर्शन गर्दै धर्नामा बसेका हुन् ।
उम्मेदवारी कायम गर्न माग गर्दै निकोलसका समर्थकहरु धर्ना बसेका हुन् ।