बुटवल । रुपन्देही हाप्किडो संघ तथा मिसन महिला समुहको ग्रेडिङ एवं सम्मान कार्यक्रम सकिएको छ । शुक्रवार बुटवलमा एक कार्यक्रमका बिच सम्पन्न भएको हो ।

हाप्किडो संघका अध्यक्ष भुमलाल श्रेष्ठको अध्यक्षता तथा मिसन महिला समुहकी अध्यक्ष शारदा श्रेष्ठको सह अध्यक्षता र लुम्बिनी प्रदेशका पूर्वमुख्यमन्त्री लिला गिरीको प्रमुख आतिथ्यतामा भएको कार्यक्रममा संघमा आवद्ध भएको खेलाडीहरुलाई सम्मान गरिएको थियो ।

लुम्बिनी प्रदेशका पूर्वमुख्यमन्त्री लिला गिरीले खेल क्षेत्रको विकास आजको आवश्यक्ता भएको उल्लेख गर्दै खेल मैदान र खेलाडीहरुको उत्थानको लागि सबै क्षेत्रबाट सहयोग खाँचो रहेको बताए ।

कार्यक्रममा बुटवल उपमहानगरपालिका वडा न ११ का वडाध्यक्ष रामचन्द्र क्षेत्रीले खेलले शाररीक सुगठन गर्नुको साथै खानपानबाट उत्पन्न हुने रोगहरुलाई लाग्न नदिने र बालबालिकाहरुलाई कुलतबाट बचाउन मद्धत गर्ने बताए । उनले भने, हालसम्म राम्रो काम हुँदै आएको छ, आगामी दिनमा वडाबाट भौतिक, नैतिक र आर्थिक सहायता चाहिएमा सधै साथ रहनेछ ।