बुटवल, मंसिर ८ । पशुपति कलेजको १७ औं वार्षिकोत्सव तथा अभिभावक भेला हुने भएको छ । रुपन्देहीको तिलोत्तमा नगरपालिका वडा नं.१६ बोहियामा रहेको कलेजले मंसिर १६ गते क्याम्पस प्राङ्गणमा कार्यक्रम गर्न लागेको हो ।
पशुपति कलेजलाई थप नयाँ शैक्षिक योजनाका साथ अगाडि बढाउन वार्षिकोत्सवसँग अभिभावक भेला कार्यक्रम राखिएको क्याम्पस प्रमुख कृष्ण प्रसाद शर्माले जानकारी गराए ।
पशुपति कलेजमा शिक्षा क्षेत्रमा धेरै सम्भावना रहेकाले नयाँ ढंगबाट अगाडि बढ्न अभिभावकको महत्वपूर्ण भूमिका हुने भएकाले क्याम्पसले गर्दै आएका गतिविधी र प्रगति विवरण कार्यक्रम मार्फत जानकारी गराइने सहायक क्याम्पस प्रमुख जितबहादुर राजकोटीले बताए ।
कलेजले स्थापना कालदेखि नै समय समयमा भेला, गोष्ठि र सेमिनार गर्दै कलेजलाई प्रतिस्पर्धात्मक रुपमा अगाडि बढाउनका लागि यस वर्ष पनि निरन्तरता दिँदै विविध कार्यक्रमसहित वार्षिकोत्सव कार्यक्रम गर्न लागेको शिक्षा संकाय प्रमुख नारायणप्रसाद ज्ञवालीले जानकारी गराएका छन् ।
कलेजमा अध्ययनरत विद्यार्थीको मनोभावनालाई उच्च राख्न भूपू विद्यार्थीको उर्जा महत्वपूर्ण हुने भएकाले सप्ताहव्यापी कार्यक्रममा भूपू विद्यार्थी भेलाको आयोजना गरिने    व्यवस्थापन संकाय प्रमुख खेमानन्द चापागाईंले बताए ।
वार्षिकोत्सवको अवसरमा क्याम्पसमा अध्ययनरत विद्याथीवीच मंसिर ९ गते शुक्रबार टपरी खुट्ने तथा बत्ति कात्ने प्रतियोगिता, १० गते शनिबार भूपू विद्यार्थी भेला तथा रक्तदान र छात्रवृति वितरण, ११ गते आइतबार कविता वाचन प्रतियोगिता, स्लो साइकल दौड प्रतियोगिता, १२ गते सोमबार हाजिरी जवाफ प्रतियोगिता, १३ गते मंगलबार वक्तृत्वकला र भलिबल प्रतियोगिता, १४ गते बुधबार कुर्ची दौड, १५ गते निबन्ध प्रतियोगिता र सटफुट प्रतियोगिता कार्यक्रम आयोजना गरिएको प्रचार प्रसार उपसमिति संयोजक तथा सहायक प्राध्यापक पुनहरि बेल्बासेले जानकारी गराएका छन् ।