बुटवल, मंसिर २२ गते । रुपन्देहीको बुटवलमा भएको १२ औं एभरेष्ट अन्तर विद्यालयस्तरीय वादविवाद प्रतियोगिताको उपाधि कालिका मानवज्ञान मावि बुटवलले जितेको छ । कालिका मानवज्ञानका विद्यार्थी करिना खनालले उपाधि जितेकी हुन् । करिना खनालले उपाधिसहित नगद १५ हजार, शिल्ड तथा प्रमाणपत्र हात पारिन् ।

एभरेष्ट इङलिस बोर्डिङ माध्यमिक विद्यालयको आयोजनामा शुक्रबार भएको वादविवाद प्रतियोगितामा १७ विद्यालयका प्रतिस्प्रर्धी विद्यार्थीलाई उछिन्दै खनालले उपाधि जित्न सफल भइन । देशको आर्थिक समृद्धि ः स्थानीय उत्पादनको बजारीकरण वा रेमिट्यान्स भन्ने शिर्षकको पक्ष र विपक्षमा बिद्यार्थीले आआफ्ना विचार राखेका थिए ।

प्रतियोगितामा नवज्योति इङलिस बोर्डिङ स्कुल तिलोत्तमाकी विद्यार्थी रक्षा मिश्र द्वितीय भइन् । उनले नगद १० हजारसहित शिल्ड तथा प्रमाणपत्र हात पारिन् । यस्तै लिटिल फ्लावर्स इङलिस माध्यमिक विद्यालय फर्साटिकरका विद्यार्थी समर्थ फौदार क्षेत्रीले तृतीय स्थान हासिल गर्न सफल भए । तृतीय स्थान हासिल गर्न ६ हजार नगद प्राप्त गरे । मणिमुकुन्द माध्यमिक विद्यालय बुटवलका विद्यार्थी एन्जल बेल्वासेले प्रोत्साहन पुरस्कारसहित नगद तीन हजार, शिल्ड तथा प्रमाणपत्र हात पारिन् ।

विद्यालयका प्राचार्य कृष्ण न्यौपानेको अध्यक्षतामा भएको कार्यक्रमको उद्घाटन गर्दै प्रदेश परिक्षा ब्यवस्थापन कार्यालय लुम्विनीका प्रमुख रमाकान्त तिवारीले शैक्षिकसंगै अतिरिक्त कृयाकलापमा पनि विद्यार्थीलाई अवसर दिनुपर्ने बताए ।
विद्यार्थीलाई पाठ्यपुस्तकको ज्ञानसंगै अतिरिक्त कृयाकलापमा पनि पोख्त बनाउनु पर्ने उल्लेख गर्दै ब्यवहारिक र सीपमुलक शिक्षा सिकाइमा अतिरिक्र कृयाकलापले महत्वपूर्ण भुमिका खेल्ने बताए ।

कार्यक्रममा बुटवल उपमहानगरपालिका वडाध्यक्ष यज्ञप्रसाद पंगेनी, एन प्याब्सन नेपालका केन्द्रीय सचिव कृष्णप्रसाद पौडेल, केन्द्रीय सदस्य विष्णु पौडेल, अभिभावक महासंघका केन्द्रीय सदस्य लोकनाथ ज्ञवाली, नेपाल पत्रकार महासंघका अध्यक्ष रामराज पोखरेल, परिक्षा ब्यवस्थापन कार्यालयका अधिकृत बाबुराम भण्डारी विद्यालयका सहप्राचार्य भिमसेन गौतम लगायतले प्रतियोगिताका विजयी विद्यार्थीलाई बधाई तथा शुभकामना दिएका थिए ।

साहित्यकार ऋषीराम भुसाल, डाक्टर शंकरप्रसाद गौतम, राजेन्द्रप्रसाद आचार्यले निर्णायकको भुमिका निभाउनु भएको थियो । शिक्षक माधव पौडेलले कार्यक्रम सञ्चालन गरेका थिए ।