बुटवल, १६ मंसिर–
कोरोनाका कारण रोकिएको रुपन्देही जिल्ला लिग फुटवल प्रतियोगिता शुक्रवारबाट पुनः सुरु हुने भएको छ । बैशाखमा कोरोनाका कारण स्थगित गरिएको लिगको अन्तिम चरणका प्रतिष्पर्धा हुने जनाइएको छ ।
प्रतियोगितामा जिल्लाका झरना स्पोर्टस्, सुनौलो संगम, चाँदनी युवा क्लब, बुटवल यूनाइटेड, फर्साटिकर युवा क्लब, लिस्नु युवा क्लब, गोर्खा ब्वाइज युवा क्लब, भूपू सैनिक स्पोर्टस् क्लब, सौभाग्य युवा क्लब र डि. एम. सी बीच प्रतिस्पर्धा हुने छ ।
रुपन्देही फुटवल संघको आयोजनामा हुन लागेको लिग १० वा टिम छनौट भएका छन् । १० टिमलाई एक आपसमा प्रतिष्पर्धा गराई अकंको आधारमा लिग विजेता छनौट गरिने छ । छनौट खेलमा सबै टिम एक आपसमा प्रतिष्पर्धा गर्ने क्रममा ४५ पटा खेल खेलाइने जनाइएको छ । जसमा एउटा टिम ९ वटा खेल खेल्ने छ ।

२३ दिनसम्म सञ्चालन हुने प्रतियोगिता बुटवलको देविनगर स्थित एन्फा ऐकेडेमीको खेल मैदानमा हुने विहिवार बुटवलमा पत्रकार सम्मेलनको आयोजना गरि जानकारी गराइएको थियो । प्रतियोगिताको उद्घाटन खेलमा झरना स्पोर्टस् क्लब र सुनौलो संगम युवा क्लब बीच प्रतिस्पर्धा हुने खेल संयोजक मुकेश कुंवरले जानकारी दिए । सम्मेलनमा संयोजक कुंवरले प्रतियोगिताको विजेता टिमले नगद राशी १ लाखसहित पुरस्कार प्राप्त गर्ने छ भने उप विजेता टिमले ५० हजार, तृतीय हुने टिमले ३० हजार तथा सान्त्वनाले २० हजार नगद प्राप्त गरिने जानकारी दिएका थिए ।
यसैगरि प्रतियोगितामा विधागत तर्फका ५ जनालाई नगद ५ हजारका दरले पुरस्कार प्रदान गरिने तथा प्रत्येक प्रतियोगितामा म्यान अफ दि म्याचलाई समेत आकर्षक उपहारको व्यवस्था गरिएको जनाइएको छ ।
गत वर्ष बैशाख ७ गतेदेखि तिलोत्तामा भएको छनोटका आधारमा सहगभागी टिमहरु बीच प्रतियोगिता हुने भएको हो । छनोट चरणमा उत्कृष्ट ८ टिमले लिगका लागि स्थान पक्का गरिसकेपछि बाँकी रहेका ९ टिमलाई २ समूहमा विभाजन गरी छनोट प्रतियोगिता गराइएको र छनोट खेलमा दुई समूहको पुच्छारमा रहेका समूह लिगबाट वन्चित भएको संघका महासचिव लोक पुनले जनाएका थिए ।

रुपन्देही फुटवल संघका सचिव शंकर मल्लका अनुसार प्रतियोगिता सम्पन्न गर्नका लागि करिब ८ लाख खर्च अनुमान गरिएको र लिग सञ्चालनका लागि एन्फाले ५ लाख रुपैयाँ उपलब्ध गराएको छ भने अन्य रकम आयोजकले नै जुटाउने बताएका छन् । रुपन्देहीमा रहेका २० वटा क्लबहरु मध्ये २ वटा क्लब छनोट चरणबाटै बाहिरिएका कारण प्रतियोगिता सहभागि हुन पाएनन् भने ३ वटा क्लबले आवश्यक काजगी प्रक्रियाहरु पूरा गर्न नसक्दा अयोग्य भएका कारण छनोट चरणमा नै सहभागी हुन पाएनन् । छनोट चरणबाट माछापुच्छ्रे क्लब र ख्रिष्टियन युथ क्लब बाहिरिएका थिए भने अमर ज्योति युवा क्लब, लुम्बिनी स्पोर्टस् क्लब र नवयुवा खेलकूद तथा साँस्कृतिक परिवारले आवश्यक कागजी तथा कानूनी प्रक्रिया पूरा गर्न नसक्दा प्रतियोगितामा सहभागीता जनाउन पाएका छैनन् ।
प्रतियोगितामा क्लबहरुले ए, बि वा सी डिभिजन खेलेका कुनै पनि खेलाडीलाई सहभागि गराउन पाउने छैनन् भने विभागमा रहेका (नेपाल आर्मी, नेपाल प्रहरी र सशस्त्र प्रहरी) कुनै पनि व्यक्तिले सहभागी हुन नपाउने आयोजकले जनाएको छ । कुनै पनि डिभिजनमा सहभागी नभएका तथा अन्य जिल्ला लिगमा सहभागी नभएका रुपन्देही बाहिरका खेलाडीहरुले समेत प्रतियोगितामा सहभागीता जनाउन पाउने भएका छन् ।