बुटवल, जेठ २५ गते । बुटवलमा सम्पन्न राष्ट्रिय सहकारी अभियान लुम्बिनी प्रदेशको प्रथम भेलाले लोकेन्द्र सुनार अध्यक्ष रहेको तदर्थ समिति गठन गरेको छ । राष्ट्रिय सहकारी अभियान लुम्बिनी प्रदेशको उपाध्यक्षमा उपाध्यक्षमा सम्झना पौडेल, सचिवमा कविराम भट्टराई, कोषाध्यक्षमा गिरबहादुर पौडेललाई चयन गरिएको छ ।

त्यस्तै समितिको सदस्यहरुमा हेमलाल खनाल, लक्ष्मी कुँवर, दिनमणि पौडेल, विष्णु थापा, रामप्रसाद गैरे, रामबहादुर चमारलगायत रहेका छन् । भेलापछिको बैठकले प्यूठानका अमरध्वज राना र रुपन्देहीका केपी पोखरेललाई सल्लाहकारमा चयन गरेको छ ।

राष्ट्रिय सहकारी अभियान केन्द्रीय अध्यक्ष गंगालाल सापकोकोटा प्रमुख आतिथ्यतामा भेला भएको थियो । उक्त भेलामा बोल्दै अध्यष सापकोटाले संविधानमा उल्लेख भएको तीन खम्बे देश विकासको अर्थनीतको एउटा खम्बा सहकारी क्षेत्र भएको बताए ।  उनले सहकारीलाई उचित नीति, कानुनमार्फत राज्यले प्रवद्र्धन र नियमन गर्नुपर्नेमा विद्यमान कानुनको समूचीत कार्यान्वयन नभएका कारण सहकारीमा समस्या देखिएको बताए ।

सरकारले हालै सहकारीसँग सम्बन्धित केही ऐन र मापदण्ड जारी गर्दा पनि सहकारी क्षेत्रको प्रवद्र्धन र विकासका लागि भन्दा पनि सहकारी क्षेत्रलाई अझै साँघुरो घेराभित्र राख्ने र आम समुदायको भन्दा पनि निश्चित वर्गलाई फाइदा पुग्ने अनुकूल वातावरण तयार गर्ने काम गरेको अध्यक्ष सापाकोटाको भनाइ छ ।
सहकारी संविधानमा उल्लेख भए पनि देशको सन्दर्भमा कस्तो सहकारी नीति हुने र सहकारी प्रवद्र्धनको प्रष्ट खाका के हुने भन्ने विषयमा राज्य अलमलमा परेको बताए ।
‘सहकारीलाई केही शक्तिकेन्द्र र राजनीतिक संरक्षणमा केही सहकारीका ठगले आफ्नो स्वार्थसिद्ध गर्नका लागि सहकारीलाई उद्यम बनाएकाले अहिले सहकारीमा समस्या सिर्जना भएको अध्यक्ष सापकोटाको तर्क छ ।

कार्यक्रममा अखिल नेपाल जनजाति सम्मेलनका महासचिव अमरध्वज रानाले मुख्य गरी पालिका तहमा स्थानीय सरकारले चाहने हो भने सहकारी क्षेत्रलाई सहज ढङ्गले प्रवद्र्धन र नियमन गरी अगाडि बढाउन सक्ने गरी कानुनमा व्यवस्था भएकाले स्थानीय तहबाटै सहकारी अभ्यास अगाडि बढाउनुपर्नेमा जोड दिए ।

अभियानका केन्द्रीय सल्लाहकार लिलाबहादुर केसीले सहकारी क्षेत्रको अहिलेका जल्दोबल्दो समस्यालाई जनताका बिचमा वास्तविक कुरा लैजाँदै सहकारीमा फैलाइएका भ्रमलाई चिर्नुपर्ने बताए ।

अखिल नेपाल ट्रेड युनियन महासंघ (अन्टुक) का जिल्ला अध्यक्ष कविराज गिरीले सहकारीलाई सही ढंगले सञ्चालन गर्नुपर्ने र तयसका लागि नियमनकारी निकायहरु सक्रय हुनुपर्नेमा जोड दिए ।

अभियानका लुम्बिनी प्रदेश संयोजक तथा केन्द्रीय सदस्य लोकेन्द्र सुनारको अध्यक्षता, कविराम भट्टराईको स्वागत र कमला वञ्जाडेको सञ्चालनमा कार्यक्रम भएको थियो ।