बुटवल, असार १९ गते । रुपन्देहीको देवदह नगरपालिकाले आर्थिक वर्ष वर्ष २०८०÷०८१ को लागि १ अर्व ७ करोड २४ लाख ५० हजार बरावरको बजेट पास गरेको छ । मंगलबार सम्पन्न १२ औं नगर सभाको दोश्रो नगर सभामा बजेट प्रस्तुत गर्दै उपप्रमुख विद्यालक्ष्मी गुरुङले आन्तरिक राजश्वतर्फ १८ करोड ४१ लख ६० हजार, लुम्विनी प्रदेश सभाबाट ४ करोड ६४ लाख १९ हजार र संघीय सरकारबाट ८४ करोड १८ लाख गरी १ अर्व ७ करोड २४ लाख ५० हजार बरावरको बजेट प्रस्तुत गरेकी हुन् ।

उपप्रमुख गुरुङले शिक्षातर्फ २४ करोड ३० लाख, स्वास्थ्यतर्फ ४ करोड ४८ लाख, लक्षित वर्गतर्फ ३१ करोड ५८ लाख, आर्थिक विकासतर्फ (पशु, कृषि, पर्यटन) लगायत गरी २ करोड ४ लाख, अव्यवस्थित भूमि व्यवस्थापनका लागि ३ करोड २४ लाख विनियोजन गरिएको छ ।

यसैगरी पूर्वाधार विकासतर्फ ११ करोड ३२ लाख, वन वातावरण र विपद्तर्फ १ करोड ७७ लाख, संस्थागत विकासतर्फ १६ करोड बजेट विनियोजन गरिएको छ । आर्थिक बर्ष २०७९÷०८० मा आन्तरिक राजश्व १४ करोड लक्ष्य लिएपनि विविध कारणले ५ करोड ५६ लाख मात्र संकलन भएको उपप्रमुख गुरुङले बताइन । बजेटमा प्रत्येक वडालाई १ करोड बरावरको आर्थिक बर्ष २०८०÷८१ को लागि योजना छनोट गर्न अधिकार प्रदान गरिएको छ ।

नगर सभामा नगर प्रमुख धुव्रप्रसाद खरेलले देवदह नगरपालिकाको आर्थिक वर्ष २०७९÷०८० को प्रगति विवरण प्रस्तुत गरेका थिए । उनले यस आर्थिक बर्षमा कृषकलाई १७ हजार ४० बोरा मल १५ वटा डिलरमार्फत वितरण गरिएको जानकारी दिंदे भने –एक वडा एक तरकारी नर्सरी प्रभावकारी भएको, मकै पटेक कार्यक्रम मार्फत मकै उत्पादन, मल तयार गर्न क्पोष्ट विन वितरण, अपाङलाई ह्वील चियर प्रदान गरिएको छ ।

नगर प्रमुख खरेलले कक्षा १ देखि ८ सम्म स्थानीय पाठयक्रम निर्माण गरी लागु गरिएको, सामुदायिक विद्यालयमा अध्ययनरत विद्यार्थीलाई निःशुल्क पाठ्यपुस्तक वितरण गरिएको जानकारी गराए ।

नगर प्रमुख खरेलका अनुसार सम्पूर्ण विद्यालयमा शुद्ध खानेपानीको व्यवस्था, वालमैत्री नगर बनाउने गरी समुदाय, विद्यालय, वडा र नगर स्तरीय वाल सञ्चाल गठन, नगर अस्पताल संचालन गरी नागरिकलाई सेवा प्रदान, नगर अस्पतालबाट स्वास्थ्य विमाको प्रथम विन्दुको शुभारम्भ गरि सेवा प्रदान गरिएको छ ।

नगर प्रमुख खरेलले स्वास्थ्य शिविर संचालन, पर्यटकीय क्षेत्रको रुपमा विकास गर्न खयरडाडामा उत्खनन् गरिएको छ भने । नगर सभामा देवदह नगरपालिकाले गरेका नीतिगत निर्णयहरु पास गरेको छ । नगर सभामा देवीप्रसाद न्यौपाने, चमकान्त गौडेल, अमर लामिछानेले बोल्दै शिक्षा, कृषि, पशुपालन, पर्यटन क्षेत्रमा प्रयाप्त बजेट विनियोजन नभएको प्रतिक्रिया दिएका थिए ।
नगर सभाको अवसरमा स्थानीय तहले लिएको कक्षा ८ का उत्कृष्ट विद्यार्थी, शिक्षक,टोल विकास संस्थाका पदाधिकारीलाई सम्मान गरिएको छ ।